Update:

Yanga, Azam FC zilitumie Kombe la Mapinduzi kujiandaa kimataifa


 Ligi Kuu Bara imesimama wiki mbili kupisha michuano ya Kombe la Mapinduzi inayoendelea Zanzibar hivi sasa.
Ingawa michuano hii haitambuliki kimataifa, lakini imekuwa ikizishirikisha pia timu kutoka nje ya nchi.
Kwa mfano, mwaka huu michuano hiyo inazishirikisha timu 12, kati ya hizo imealikwa moja kutoka nchini Uganda, URA. Inaunga na timu nyingine za Bara na visiwani kucheza michuano hiyo ya wiki mbili.
Nipashe tunaamini kwamba Kombe la lina nafasi kubwa ya kuziandaa timu za Tanzania zinazotarajia kushiriki michuano ya kimataifa kuanzia mwezi ujao.
Yanga, miongoni mwa timu kutoka Bara zinazoshiriki michuano hiyo Zanzibar, mwaka huu itaiwakilisha nchi kwenye michuano ya Klabu Bingwa na Azam FC kwenye michuano ya Kombe la Shirikisho.
Kwa kuzingatia umuhimu wa mashindano hayo, tunaamini Azam, ambayo nayo inashiriki Kombe la Mapinduzi kama ilivyo Yanga, zote kwa pamoja zitayachukulia mashindano haya kama sehemu ya kujitengeneza.
Yanga imeamua kwenda wachezaji wake wote ili kuwapa nafasi ya kucheza, kadhalika wawakilishi wenzao Azam FC.
Lakini pia michuano hiyo ni fursa ya kujiimarisha zaidi kwa timu zote, ikiwamo Simba na Mtibwa Sugar kabla ya kurejea kwenye mechi za ligi kuu.
Tunaamini timu zote zitatumia nafasi hiyo vizuri ikiwa ni pamoja na kuyafanyia kazi makosa na udhaifu utaoonekana wakati wote wa mashindano.
Zana kwamba mashindano hayo hayana taswira ya kimataifa, isizifanya timu kucheza katika hali ya kujifurahisha, badala yake zicheze kwa ushindani wa kweli.
Tungependa kuzikumbusha timu zote zinazoshiriki Kombe la Mapinduzi kuwa, timu zinazotumia muda wake vizuri kujiandaa na mashindano mbalimbali, ndizo zinazokuwa jirani na mafaniki kuliko zile ambazo hazina utamaduni huo.
Hivyo, viongozi wala wachezaji wasiwe na sababu zozote za kubeza mashindano hayo na kuona kama sehemu ya kupoteza muda.
Pia Nipashe tungependa kuchukua nafasi hii kuwapongeza waandaaji wa Kombe la Mapinduzi, Chama cha Soka Zanzibar (ZFA), ambao wamesema wameboresha kwa kiasi kikubwa michuano ya mwaka huu.
Katibu Msaidizi wa ZFA, Masoud Attai alisema dhamira yao mwaka huu ni kuhakikisha mashindano hayo yanabeba sura ya ushindani zaidi kuliko wakati uliopita.
Katika hilo, wameamua kuzipa nafasi zaidi timu za Tanzania kwa kupunguza idadi ya timu alikwa.
Sababu kuwa ni kuhakikisha michuano hiyo inayofanyika nyumbani iwe na faida kubwa kwa wenyeji.
Zawadi ya Sh. milioni 10 kwa mshindi wa kwanza na Sh. milioni 5 kwa mshindi wa pili zitakuwa kiini cha ushindani wa kweli miongoni mwa timu shiriki.